Rev Kurapati Vijay Kumarమనం బైబిల్ ప్రదేశాలను మరియు ప్రజలను అధ్యయనం చేస్తున్నప్పుడు, బైబిల్ చరిత్రలోని ప్రధాన కాలాలను గురించి నేర్చుకోవడం మంచిది. ఎందుకంటే, అవి దేవుని ప్రజలు ఎక్కడ ఎప్పుడు ఎలా జీవించారు, ఆయా కాలాలలో జరిగిన ప్రధాన సంఘటనల పై అవగాహన కలిగిస్తాయి అలాగే బైబులును బాగా అర్ధం చేసుకోవడానికి సహాయపడతాయి.
బైబిల్ చరిత్రలోని తొమ్మిది ప్రధాన కాలాలను గురించి నేర్చుకొందాం:
ఎ. బైబిల్ చరిత్రలోని తొమ్మిది ప్రధాన కాలాలు : 1) సృష్టి నుండి అబ్రహం వరకు 2) పితరులు 3) ఐగుప్తు దాస్యము 4) నిర్గమనం మరియు న్యాయాధిపతులు 5) యునైటెడ్ కింగ్‌డమ్ 6) విభజించబడిన రాజ్యం 7) బబులోను ప్రవాసం మరియు తిరిగి రావడం 8) ఇంటర్‌టెస్టమెంటల్ కాలం మరియు 9) కొత్త నిబంధన కాలం. ఈ కాలాలను మీరు గుర్తుంచుకోగలిగితే, బైబిల్ చరిత్రలోని అన్ని ముఖ్యమైన సంఘటనలను వాటి సరైన క్రమంలో మరియు అవి ఎప్పుడు జరిగాయో తెలుసుకోవడానికి ఇది మీకు సహాయపడుతుంది.
1) సృష్టి నుండి అబ్రహం వరకు (క్రీ.పూ. 2200 వరకు). ఈ కాలం ఆదికాండము 1-11లో వివరించబడింది. ఈ పెద్ద సంఘటనలన్నీ ఈ కాలములోనే జరిగాయి: సృష్టి, పతనము, జలప్రళయం మరియు బాబెల్ గోపురం. సృష్టి యొక్క ఖచ్చితమైన తేదీగాని లేదా జలప్రళయం యొక్క ఖచ్చితమైన తేదీగాని మనకు తెలియదు. క్రీస్తు జననానికి ముందు క్రీ.పూ. 3000 నుండి 4000 సంవత్సరాలలో మధ్యనుండి ప్రపంచంలోని సంఘటనలను డేటింగ్ చేయడం ప్రారంభించారు. అయితే, బైబిల్ లోని కొన్ని ప్రారంభ సంఘటనల యొక్క కాలాలను మనం ఊహించి చెప్పగలం. అబ్రహం క్రీ.పూ. 2200 సంవత్సరానికి దగ్గరగా జన్మించి ఉంటాడని మరియు అతని కాలం తర్వాత జరిగిన సంఘటనలను మరింత ఖచ్చితంగా డేటింగ్ చేయగలమని మనకు తెలుసు.
2) పితరుల కాలం (క్రీ.పూ. 2200-1850). ఈ కాలం ఆదికాండము 12-50 ల మధ్య వివరించబడింది. “పితరుడు” అనే పదం “స్థాపక తండ్రి” అనే అర్థం వచ్చే గ్రీకు పదాల నుండి వచ్చింది. ఇది యూదు ప్రజల తండ్రుల గురించి, ముఖ్యంగా అబ్రహం, ఇస్సాకు మరియు యాకోబుల గురించి మాట్లాడటానికి మనం ఉపయోగించే పదం. ఈ కాలంలో అబ్రహం కనాను (ఇజ్రాయెల్) దేశానికి వచ్చాడు. ఈ కాలం చివరిలో ఇజ్రాయెల్ దేశంలో సంభవించిన కరువు కారణంగా యాకోబు మరియు అతని కుటుంబం యోసేపుతో నివసించడానికి ఈజిప్టుకు వెళ్లారు.
3) ఐగుప్తు చెర (క్రీ.పూ. 1850-1450). ఇశ్రాయేలీయులు దాదాపు 400 సంవత్సరాలు ఈజిప్టులో బంధీలుగా ఉన్నారు. యోసేపు మరణం తర్వాత ఐగుప్తీయులు యాకోబు వారసులను బానిసలుగా చేసుకుని, బలవంతపు శ్రమ ద్వారా వారి జీవితాలను చాలా కష్టతరం చేశారనే వాస్తవం తప్ప ఈ కాలం గురించి బైబిల్ మనకు ఎక్కువగా చెప్పటం లేదు. ఈ కాలం చివరిలో, దేవుడు మోషే అతని సోదరుడైన అహరోనులను దేవుని ప్రజలను ఐగుప్తులోని బానిసత్వం నుండి బయటకు నడిపించడానికి పిలిచాడు.
4) నిర్గమనం మరియు న్యాయాధిపతుల కాలం (క్రీ.పూ. 1450-1050). ఈ కాలం నిర్గమకాండము, లేవీయకాండము, సంఖ్యాకాండము, ద్వితీయోపదేశకాండము, యెహోషువ, న్యాయాధిపతులు, 1 సమూయేలు మరియు రూతులో వివరించబడింది. ఈ కాలం ఐగుప్తు నుండి నిర్గమనంతో ప్రారంభమై ఇశ్రాయేలు మొదటి రాజుగా సౌలు అభిషేకించబడటంతో ముగుస్తుంది. ఈ కాలంలో ఇశ్రాయేలీయులు ఐగుప్తు నుండి బయలుదేరి 40 సంవత్సరాలు ఎడారిలో సంచరించారు. ఇశ్రాయేలీయులు కనాను దేశాన్ని తిరిగి స్వాధీనం చేసుకోవడానికి పోరాడిన కాలం కూడా ఇదే. యెహోషువను, న్యాయాధిపతులను దేవుడు ఇశ్రాయేలుకు నాయకులుగా లేవనెత్తిన కాలం కూడా ఇదే.
5) యునైటెడ్ కింగ్‌డమ్ (క్రీ.పూ. 1050-950). ఈ కాలం గురించి సమూయేలు, రాజులు మరియు దినవృత్తాంతాలలో వివరించబడింది. ఇది ఇశ్రాయేలు మొదటి ముగ్గురు రాజులైన సౌలు, దావీదు మరియు సొలొమోనుల కాలం. ఈ కాలం దాదాపు 100 సంవత్సరాలు మాత్రమే కొనసాగింది. ఇది ఇశ్రాయేలు యొక్క గొప్ప భూసంబంధమైన పాలన మరియు విజయాల కాలం.
6) విభజించబడిన రాజ్యం (క్రీ.పూ. 950-600). ఈ కాలం గురించి మనం రాజులు మరియు దినవృత్తాంతాలులో మరియు పాత నిబంధనలోని ప్రవక్తల గ్రంధాలలో చివరి మూడు గ్రంధాలలో తప్ప మిగతా వాటిలో వివరించబడింది. ఈ కాలంలో, ఇశ్రాయేలు దేశం ఒకదానికొకటి వ్యతిరేకంగా పోరాడుతున్న రెండు రాజ్యాలుగా విభజించబడింది – ఉత్తరాన ఇశ్రాయేలు రాజ్యం మరియు దక్షిణాన యూదా రాజ్యం. ఇశ్రాయేలు రాజ్యం దాదాపు 725 B.C.లో అస్సీరియన్లచే ఆక్రమించబడినప్పుడు ముగిసింది. యూదా రాజ్యం కొద్దికాలం వరకు కొనసాగింది. క్రీ.పూ. 600 తర్వాత బాబిలోనియన్లు దానిని నాశనం చేశారు.
7) బబులోను చెర మరియు వెనుకకు తిరిగి రావడం (క్రీ.పూ. 600-400). దక్షిణ యూదా రాజ్యంలోని యూదులు 70 సంవత్సరాలు బాబిలోన్‌లో బందీలుగా ఉన్నారు. ఎజ్రా మరియు నెహెమ్యా, దానియేలు మరియు చివరి ముగ్గురు చిన్న ప్రవక్తలు (హగ్గయి, జెకర్యా మరియు మలాకీ) బాబిలోన్‌లో ఉన్న కాలం గురించి మరియు యూదులు యెరూషలేము నగరాన్ని మరియు దాని ఆలయాన్ని పునర్నిర్మించడానికి ఎలా తిరిగి వచ్చారో చెప్తున్నాయి.
8) ఇంటర్ టెస్టమెంటల్ కాలం (400 క్రీ.పూ. – 0). ఇంటర్ టెస్టమెంటల్ అంటే “నిబంధనల మధ్య కాలం” అని అర్థం. ఇది పాత నిబంధన చివరి పుస్తకం (మలాకీ, క్రీ.పూ. సుమారు 400 లో వ్రాయబడింది) పూర్తయినప్పటి నుండి మరియు క్రీస్తు జననం (సుమారు 0) వరకు చరిత్ర కాలానికి మనం ఇచ్చే పేరు. అపోక్రిఫా అని పిలువబడే పుస్తకాలు (ఇవి దేవునిచే ప్రేరేపించబడలేదు) ఈ కాల చరిత్ర గురించి మనకు కొంత చెబుతాయి. ఈ సమయంలో, గ్రీకులు మరియు తరువాత మక్కబీస్ అని పిలువబడే యూదు కుటుంబాలు ఇజ్రాయెల్‌ను పరిపాలిస్తున్నారు.
9) కొత్త నిబంధన కాలం (0-క్రీ.శ. 100). యేసు 0వ సంవత్సరంలో జన్మించాడు (వాస్తవానికి కొన్ని సంవత్సరాల ముందు, బహుశా క్రీ.పూ. 6-4 మధ్య). అపొస్తలులలో చివరివాడైన యోహాను, క్రీ.శ. 100కి కొంతకాలం ముందు మరణించాడు. ఈ రెండు తేదీల మధ్య కొత్త నిబంధన సంఘటనలు జరిగాయి మరియు కొత్త నిబంధన పుస్తకాలు వ్రాయబడ్డాయి. అందుకే మనం దీనిని కొత్త నిబంధన కాలం అని పిలుస్తాము. ఇవి బైబిల్ చరిత్రలోని తొమ్మిది ప్రధాన కాలాలు.
